CCCXIII.

1417, Februar 1. Prag.

König Wenzel vidimiert und bestätigt mehrere dem Kloster von Kaiser Karl IV. verliehene Privilegien.

Wenceslaus dei gracia Romanorum rex semper augustus et Boemie rex notumfacimus tenore presencium universis. Super solium maiestatis regie quamvis immeriti superne maiestatis gracia constituti personas monasticas, que a fluidis seculi sequestrati deliciis pia Cristi militum imitantes exempla suave iugum domini suscipiunt susceptumque sub innocencie puritate per aspera vite percurrunt, regalibus auxiliis tanto clemencius, a molestiis, quas eis plerumque mundane ambicionis inferre molitur malicia, nitimur subvenire, quanto speramus uberius, nostram et regnorum nostrorum felicitatem talium devotis apud dominum precibus promoveri. Sane honorabilis et religiosus Johannes abbas monasterii in Camencz ordinis Cisterciensis, devotus noster dilectus, in nostre maiestatis presencia personaliter constitutus suo et conventus sui nomine nobis humiliter supplicavit, quatenus certas litteras ipsis per serenissimum quondam dominum Karolum Romanorum imperatorem semper augustum et Boemie regem, dominum et genitorem nostrum, dum ipse adhuc Romano regio titulo fungeretur, datas, traditas et concessas de nostre benignitatis clemencia dignaremur graciosius confirmare. Quarum litterarum tenores presentibus sunt inserti; et prime quidem littere tenor tali est: - No. CCXVIII. - Secunde vero littere tenor sequitur et est talis: - No. CCXXVII. - Tercie vero littere tenor sequitur in hec verba: - No. CCXXXIV. - Nos igitur predicti Johannis abbatis in Camencz et conventus sui ibidem precibus, utpote racionabilibus, benignius annuentes, ipsis non per errorem aut improvide, sed animo deliberato, sano procerum et fidelium nostrorum accedente consilio et de certa nostra sciencia prefatas litteras, prout de verbo ad verbum expressantur superius, approbavimus, ratifficavimus, innovavimus et, confirmavimus, approbamus, ratifficamus, innovamus et auctoritate regia Boemie presentis scripti patrocinio confirmamus, decernentes auctoritate regia et volentes expresse, quod predicte littere in singulis suis articulis, sentenciis, punctis et clausulis, ex nunc inantea perpetuam obtinere debeant roboris firmitatem, presencium sub nostre regie maiestatis sigillo testimonio litterarum. Datum Prage anno domini millesimo quadringentesimo decimo septimo die prima Februarii, regnorum nostrorum anno Boemie quinquagesimo quarto, Romanorum vero quadragesimo primo.
Ad relacionem Johannis de Lestkow, subcamerarii, Johannes Weilberg, decretorum doctor.

Or. Perg. An Fäden von schwarzweisser Seide hängt das wohlerhaltene Majestätssiegel mit (Doppeladler) Rücksiegel.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 10, Urkunden des Kloster Kamenz. Hrsg von Dr Paul Pfotenhauer, Breslau 1881.